Shumë shpejt qytetarët do të mund të marrin kartat e shëndetit në portalin e-albania. Lajmin e bëri të ditur ministrja e Shëndetësisë dhe Mbrojtjes Sociale, Ogerta Manastirliu.
Vendimi u mor në mbledhjen e qeverisë, ku ministrja theksoi se do të jenë vetë institucionet që do të marrin online të gjitha të dhënat.
“Për të gjithë ata qytetarë që duhet të marrin dokumente në zyrat e administratës, këtë javë ne shtojmë listën e këtyre dokumenteve që mund të tërhiqen online në portalin e-albania, si nga qytetarët edhe nga institucionet publike që u nevojiten ato.
Vërtetimet e pensionit dhe kartën e shëndetit qytetarët mund t’i tërheqin duke filluar nga kjo javë në portalin e-albania.
Më e rëndësishmja asnjë institucion shtetëror nuk do t’ua kërkojë më këto dokumente qytetarëve për nevoja të procedurave të tyre duke u kursyer sorollatjet e panevojshme të gjithë atyre që marrin këto shërbime”, tha ministrja Manastirliu.
