Ministrja e Shëndetësisë, Ogerta Manastirlliu, ka vizituar qendrat e emergjencës të ngritura në Thumanë, si pasojë e tërmeteve.
Manastirlliu u shpreh se në këto qendra po ofrohet shërbim mjekësor 24/7 për të sëmurët kronikë por edhe çdo qytetar që ka nevojë për ndihmë.
“Me ekipin e urgjencës kombëtare, me stafet e mjekëve dhe infermierëve të zonës dhe me mbështetjen që kemi këtu nga organizata të ndryshme dhe misione të ardhur nga vendet fqinj, jemi në gatishmëri për t’ju ardhur në ndihmë të gjithë banorëve të prekur nga tërmeti që janë strehuar në këtë kamp emergjence”, tha Manastirliu.
Ndërkohë përveç shërbimit shëndetësor, po ofrohet ndihma e nevojshme në aspektin psikologjik për të traumatizuarit.
“Jemi angazhuar me ekipet e shërbimit social, Agjencinë për Mbrojtjes së Fëmijëve, urdhrin e psikologut dhe organizata për të ofruar asistencën e nevojshme psiko-sociale për fëmijët dhe për të gjithë banorët e strehuar në çadrat e emergjencës”, deklaroi ajo.
