Presidenti francez Emmanuel Macron u dha të hënën disa shkencëtarëve amerikanë dhe shkencëtarëve të tjerë të klimës, një grant multi-milionësh për të punuar në Francë.
Grantet “Make Our Planet Great Again” u krijuan për të kundërshtuar refuzimin e presidentit Trump lidhur me marrëveshjen e klimës në Paris.
Macron njoftoi këtë iniciativë, titulli i të cilës është i ngjashëm me sloganin e Trump gjatë fushatës zgjedhore “Make America Great Again”.
Sipas qeverisë franceze, më shumë se 5.000 njerëz nga rreth 100 vende shprehën interesin e tyre për grantet në fjalë, shumica e të cilëve ishin nga SHBA. Hulumtimi i tyre bazohet tek ndotja, uraganet dhe retë.
Teksa shpalli 18 fituesit e parë, 13 prej të cilëve amerikanë, Macron tha: “Franca dhe Evropa do të jenë vendet ku do të vendosim se si ta bëjmë sërish të shkëlqyer planetin tonë. Ne do të jemi atje për të zëvendësuar financimin amerikan të hulumtimeve klimatike”, u tha ai shkencëtarëve dhe sipërmarrësve në një inkubator fillestar në Paris.
Një nga fitueset, shkencëtarja amerikane e klimës, Camille Parmesan, nga Universiteti i Teksasit në Austin, tha se ishte e kënaqur që do të kalonte pesë vjet duke studiuar në Francë. Ajo tha se klimatologët kishin ndjenjën se “duhej të fshihnin atë që bënin” në atdheun e tyre.
Shpallja e fituesve të granteve erdhi pasi 50 udhëheqës botërorë pritet të mblidhen sot në Paris për Samitin Një Planet, i bashkëorganizuar nga OKB dhe Banka Botërore, ndërsa Trump nuk është i ftuar.
Ata do të takohen 2 vjet pas miratimit të Marrëveshjes së Parisit për të kufizuar ndryshimet klimatike, nënshkruar nga 195 vende.
Macron ka rezervuar rreth 30 milion euro për iniciativën e tij, me universitetet dhe institucionet franceze që japin të njëjtën shifër, e mjaftueshme kjo për të paguar për 5 vjet punë shkencëtarët.
Amerika është vendi i vetëm që hedh poshtë marrëveshjen e klimës në Paris. Trump ka kërkuar prej Kongresit që të zvogëlojë buxhetet e kërkimit klimatik të agjencive federale duke përfshirë Agjencinë për Mbrojtjen e Mjedisit, NASA-n dhe Administratën Kombëtare Oqeanike dhe Atmosferike.
Nëse kjo zbatohet, shkurtimet do të kishin vlerën e miliarda dollarëve dhe shkurtimin e mijëra vende pune.
Theresa May do të jetë midis liderëve të mbledhur në samitin e së martës, ku do të përfshihen edhe shefi i OKB-së, Antonio Guterres, Enrique Pena Nieto i Meksikës, Mariano Rajoy i Spanjës dhe Presidenti i Komisionit Europian Jean-Claude Juncke.
Samiti vjen vetëm disa javë pas Konferencës së 23-të vjetore të Palëve në Konventën e Klimës së OKB-së, e cila u mbajt në Bon. TIRANA TODAY
