Është një ndër figurat më të komentuara për batutat e tij, mirëpo pak njerëz e njohin historinë e tij të dashurisë. Ish-deputeti Nard Ndoka ka treguar sot se ka 30 vite i martuar me bashkëshorten e tij Kozeta Ndoka dhe se vitet e fundit janë bërë edhe gjyshër.
Çifti Ndoka ishte sot në emisionin “Rudina” ku rrëfyen se “janë rritur bashkë” pasi janë martuar shumë të rinj.
Kozeta tregoi:”Ne jemi njohur shumë herët dhe pothuajse jemi rritur bashkë. Nardi ma kishte vënë syrin që herët. Angazhimet e Nardit në politikë janë ngarkesë e madhe në familje, por fëmijët tashmë janë të rritur. Ne kemi 4 fëmijë, një vajzë dhe 3 djem, vajza është e para. Ajo është e martuar dhe ka dy fëmijë. Unë e kam mbështetur dhe e mbështes shumë Nardin dhe e gjejmë kohën të rrimë bashkë.”
Gjatë emisionit, kreu i Partisë Demokristiane rrëfeu po ashtu se bashkëshortja e tij Kozeta ka qenë mbështetja e tij më e madhe. Ai tha se tashmë ndihet i plotësuar pasi është bërë gjysh i dy nipërve Hejsi dhe Prijs.
Ndër të tjera Nard Ndoka ka rrëfyer se nipi dhe mbesa e thërrasin me emër, pasi ai vetë e ka kërkuar këtë.
Ai tregoi: “Kur vajza u bë nënë neve na dukej vetja ende shumë të rinj. Unë me shaka i thashë Stelës, vajzës që kur të rriten fëmijët e tu nuk dua të më thonë gjysh, të më thërrasin Nardi. Po kështu ndodhi vërtet.”
