Kryedemokrati Lulzim Basha ka zhvilluar një takim në Kavajë, ku bëri thirrje që ky qytet t’i prijë fitores së madhe më 25 qershor.
Basha tha se edhe të majtëve u ka ardhur në majë të hundës nga kjo qeveri, ndërsa shtoi se edhe Rama po e ndjen dështimit e tij, ndaj po tenton, siç tha Basha, t’i ngjitet trenit të Republikës së Re, trenit të fitores.
FJALA E BASHËS:
Shqiptarët janë bashkuar dhe do të dënojnë me votë Edi Ramën. Kavaja ka paralajmëruar ndryshime të mëdha në këtë vend, kështu do të ndodhë edhe këtë verë me heronjtë e rinj të Kavajës, të cilët do t’i prijnë fitores kombëtare.
Njerëzit mezi po presin të largojnë me votë qeverinë e dështimit, edhe të majtëve u ka ardhur në majë të hundës kjo qeveri.
Shqiptarët po bashkohen për të mbështetur të vetmin plan ekonomik në këtë fushatë që do rrisë ekonominë e vendit, ky është plani ekonomik i PD-së me mbështetje nga Europa në Amerikë.
Edi Rama e di fare mirë se këto zgjedhje shqiptarët do e marrin vendimin për veten e tyre. Rama e ndjen se ky është bashkimi i pamposhtur, bashkimi fitimtar, ndaj po bën çdo përpjekje të ngjitet si vagon në këtë tren, por nuk ka vend në trenin e Republikës së Re, ka vend vetëm për shqiptarë të ndershëm që duan vendin e tyre, pavarësisht bindjeve politike.
Edi Rama nuk kishte prioritet hallet tuaja, por qejfet e veta, Edi Rama dështoi dhe vjen sërish me premtime të njëjta, pa plan, pa asnjë shpresë për të ndihmuar pensionistët.
Këtë të dielë, vendimi i madh që do të merret do të jetë përfundimtar nëse do zgjedhim mjerimin, apo rritjen e ekonomisë./ Tirana Today
