Kreu i PD-së, Lulzim Basha ka reaguar lidhur me fitoren e Ermal Metës në Sanremo, duke e shfrytëzuar urimin ndaj kantautorit shqiptar edhe për politikë.
Në një postim në Facebook, Basha shkruan se triumfi i Ermalit na kujton se ka shqiptarë me talent që dinë të ecin përpara, por njerëzit e mirë, të ndershëm e të suksesshëm bien pak në sy, pasi sipas tij, lajmet për Shqipërinë e shqiptarët i dominojnë zullumi, trafikantët dhe qeveritarët banditë.
“Por e nesërmja i takon shumicës dërrmuese të shqiptarëve të ndershëm dhe me vlera. Triumfi i Ermalit është një përmendore e vlerave të vërteta të tyre”, shkruan ndër të tjera Basha.
Reagimi i plotë:
Në këto ditë të vështira kur banditët janë në krye të vendit, një kantautor i ri, Ermal Meta na fali gëzim duke triumfuar në Festivalin prestigjoz të San Remos. Triumfi i Ermalit na kujton se ka shqiptarë me talent, me energji që dinë të ecin përpara. Shqiptarë të ndershëm, krijues, të suksesshëm, njerëz të zotë dhe me vlera ka plot mes nesh, por pak bien sot në sy, sepse lajmet për Shqipërinë dhe shqiptarët i dominojnë zullumi, trafikantët dhe qeveritarët banditë.
Por e nesërmja i takon shumicës dërrmuese të shqiptarëve të ndershēm dhe me vlera. Triumfi i Ermalit është një përmendore e vlerave të vërteta të tyre.
E përgëzoj nga zemra Ermal Metën për çmimin e fituar me talentin dhe punën e tij, dhe i uroj për suksese të tjera më tej! Ky është modeli që na bën krenar dhe na frymëzon si shqiptarë!
