Një deklaratë e bërë nga nënkryetarit të PDK-së, Rexhep Hoti, ka shkaktuar reagime të mëdha në Serbi.
Madje lidhur me deklaratën ka reaguar edhe vetë presidenti serb, Aleskander Vuçiç.
Hoti në intervistën e dhënë për “lajmi.net”, pretendonte se nëse synohet ndarja e Kosovës, atëherë Kosova do të duhej të merrte Luginën dhe pjesën e saj në Sanxhak.
“Ndarja nuk është në rend të ditës. Në të kundërtën nuk mund të ndodh ndarja pa e marrë Kosova Sanxhakun, pjesën e saj në Serbi dhe në Mal të Zi. Nuk mund të ndodh ndarja re Kosovës pa e marrë Kosova Luginën e Preshevës. Nuk mund të ndodhë ndarja pa u shkëput Vojvodina prej Serbisë. Siç mund të shihet janë disa aspekte të vogla që e komplikojnë ndarjen e Kosovës”, deklaroi Rexhep Hoti.
E duke iu përgjigjur Hotit, Vuçiç është shprehur mjaftë ironik.
“A mendojnë ata që Vojvodina, Beogradi apo Shumadija janë të përfshira…ta pyesin Orbanin(kryeministri i Hungarisë) nëse ai do ua japë Kesckemetin(qytet në Hungari), çfarë mund të ju them, sigurisht që po bëj shaka”, u shpreh Vuçiç.
E ky nuk ishte reagimi i vetëm në Serbi ndaj deklaratave të Hotit.
Të gjitha mediat e Beogradit dje e kanë cituar këtë deklaratë, duke e vlerësuar si kërcënim ndaj Kosovës.
Ndaj intervistës së nënkryetarit të PDK-së reagoi edhe Milovan Drecun, kryetar i Komisionit Parlamentar për Kosovën në Serbi.
Drecun theksoi se fjalët e Rexhep Hotit dëshmojnë se synimi i shqiptarëve është krijimi i “Shqipërisë së Madhe”.
“Pa marrë para sysh se sa duken joserioze, kjo tregon qëllimin e shqiptarëve për krijimin e Shqipërisë së Madhe”, u shpreh dje Drecun.
Ndërkohë, reagime ka pasur edhe nga e ashtuquajtura zyra për Kosovën në Qeverinë e Serbisë, e udhëhequr nga Marko Gjuriç.
