“Kosova do të përballet me sfida në momentin kur luftëtarët kosovarë do të fillojnë të kthehen nga frontet e luftës”- thuhet në një raport të Programit të Kombeve të Bashkuara për Zhvillim (UNDP). Raporti i publikuar përfshin intervista me të dënuar nga gjykata e Kosovës për pjesëmarrje në frontet e huaja të luftës, por edhe me familjarët e tyre, si faktorët nxitës për kosovarët që kanë marrë pjesë në luftërat e huaja.
Zyrtarët e UNDP-së, kanë thënë se intervistimi i tyre ka qenë një proces kompleks dhe tejet i vështirë, për shkak të natyrës komplekse të ngjarjes. Por të dhënat e raportit thonë se kosovarët që kanë shkuar në vendet e tjera për të luftuar, janë nxitur nga faktorët ekonomik dhe problemet në vendin e origjinës.
Zgjerimi pikëpamjeve radikale është ndikuar edhe nga interneti dhe rrjetet sociale, thuhet mes tjerash në raportin e publikuar nga UNDP. Në raport theksohen edhe arsyet pse gratë i bashkohen lëvizjeve ekstremiste të dhunshme, e që kanë të bëjnë me pozicionimin e dobët të tyre në shoqëri dhe gjithashtu shtytje është edhe gjetja e një jete më të mirë dhe për të gëzuar më shumë liri fetare, transmeton REL.
Të dhënat e publikuar theksojnë se kosovarët kanë nisur të largohen nga vendi i tyre që nga viti 2012, ndërsa ka vijuar të intensifikohet më tej në vitin 2015. Deri në këto momente janë vrarë rreth 60 kosovarë në frontet e luftës në Irak dhe Siri, ndërsa janë kthyer 120 persona të tjerë në Kosovë pasi kanë marrë pjesë në vijat luftarake të vendeve të tjera.
