Lufta e Tretë Botërore është kthyer në një shqetësim për shumë persona në botë. Gazeta britanike “Daily Express” shkruan se kjo pasiguri është rritur pasi janë përkeqësuar situata mes disa shteteve të botës. Media britanike duke iu referuar shpërthimit të mundshëm të një Lufte të tretë Botërore ka renditur edhe shtetet më të sigurta në rast se kjo luftë nis.
Befasi në këtë studim është se sipas britanikes, Shqipëria ndodhet në 3 vendet e para, duke ndjekur SHBA dhe Zvicrën. Në SHBA, pjesa më e madhe e shteteve kanë rrjete bunkerësh. Qeveria amerikane i ka ndërtuar ato gjatë luftës së ftohtë për punonjësit federalë.
Zvicra po ashtu, është unike dhe ka bunkerë të mjaftueshëm për të akomoduar të gjithë popullatën e saj. E treta vjen Shqipëria, vend që ka më shumë se 170 mijë bunkerë, të ndërtuar mes viteve 1960-1980 gjatë sundimit komunist. Sipas llogarive, ka mesatarisht 5.7 bunkerë për çdo km katror në Shqipëri, ose ndryshe, një bunker për çdo katër shqiptarë.
Pas Shqipërisë, vjen Suedia me më shumë se 65 mijë bunkerë, që do të mund të mbanin 7 milionë njerëz në rast të një lufte të tretë botërore. Të tjera vende të sigurta konsiderohen edhe Danimarka, Norvegjia, Finlanda dhe Islanda, që kryesojnë edhe listën e vendeve më të lumtura dhe me standardet më të larta të jetesës. Ndërsa vendet më të rrezikshme, në një skenar të tillë, janë Libia, Somalia, Jemeni, Afganistani, Sudani dhe Mali, kryesisht afrikane.
