Duke komentuar protestat e diasporës rumune, e cila prej disa ditësh po tubon kundër qeverisë së majtë, analisti Fatos Lubonja citon se e ka të vështirë të imagjinojë shqiptarët që jetojnë brenda vendit, dhe jashtë, të protestojnë të gjithë të bashkuar për një kauzë të caktuar.
“Ajo fotografia ‘nuk jemi Shqipëri’ interpretohet si një auto ironi nga ndonjë shqiptar, për të thënë se ata protestojnë dhe ne nuk protestojmë. Parulla origjinale është ‘nuk duam korrupsion, por duam drejtësi’.
Tek ne nuk protestojnë kundër korrupsionit. E kam të vështirë të imagjinoj që të mblidhen politikanët në periferi të Bukureshtit, siç mblidhen politikanët në vilat luksoze në periferi të Tiranës, dhe të pyeten se si i kanë bërë këto vila. Atje nuk ka makina luksoze ‘Range Rover’”, pohon Lubonja.
Fatos Lubonja bëri edhe një krahasim mes rolit të diasporës në Rumani, dhe asaj në Shqipëri.
“Diaspora jonë vjen dhe mbështet kryeministrin. Ne s’kemi parë të vijnë nga diaspora dhe të organizohen nga rrjetet sociale, për të protestuar kundër korrupsionit. Mbështetje politike mund të ketë, por korrupsioni në Rumani është motivues i protestës.
Kur u fut Rumania në BE, shumë eksponentë të BE thanë se bëmë gabim, sepse atje ka korrupsion. Tek ne nuk ka prirje për ndryshim, por për të ikur. Ne më shumë na bashkon Skënderbeu apo kombëtarja, sesa për problemet që kemi për të ndryshuar kushtet ku jemi”, mendon Lubonja.
Për publicistin Fatos Lubonja, reforma në drejtësi nuk kap politikanët dhe zyrtarët e mëdhenj. Sipas tij, peshku i madh e ha të voglin, dhe se ne kemi një klasë politike e cila nuk ndjen peshën e përgjegjësisë. Ai po kështu ka shtuar më tej se politikanët shikojnë interesat e tyre, dhe se nuk duan t’ia dinë për popullin.
“Nuk mjafton reforma në drejtësi, pasi kjo reformë nuk i kap ata të mëdhenjtë. Peshku i madh e ha të voglin. Ne kemi një klasë politike që nuk ndjen peshën e përgjegjësisë. Këta shikojnë interesat e tyre, dhe nuk duan t’ia dinë që një popull po vuan. Emigrantët tanë më shumë janë me qeverinë”, përfundoi publicisti.
