Analisti Fatos Lubonja, e cilësoi sot marrëveshjen midis kryeministrit Edi Rama dhe kreut të Partisë Demokratike Lulzim Basha, si një kompromis politik që lidhet vetëm me interesat e tyre personale politike.
Ai theksoi se takimi midis dy liderëve politikë u zhvillua pa asnjë konsultim me forcat e tjera publike dhe opinionin publik, por e gjitha u realizua në fshehtësi.
“Lideri konsultohet dhe nuk mbyllet ne një dhomë me kundërshtarin për të gjetur zgjidhje. Lëvizja nuk u konsultua fare. Lëvizja ka dështuar që në djep. Rezultati i zgjedhjeve do të tregojë sa ka vlejtur lëvizja dhe protesta. Zhgënjyese që klasa politike sillet si fëmijë dhe sa herë zihen vijnë dhe i qetësojnë ndërkombëtarët”, u shpreh Lubonja në rubrikën “Opinion” në News 24.
Lubonja foli edhe për rolin e ndërkombëtarëve. Sipas tij, diplomatët e huaj nuk u intereson demokracia, por vetëm stabiliteti.
“Duhet theksuar se ndërkombëtarët kanë hallin e stabilitetit dhe jo të demokracisë në Shqipëri. Partitë nuk kanë përmirësime gjatë këtyre viteve. Partia Socialiste me ardhje e Edi Ramës në krye është përkeqësuar në demokracinë e brendshme”, theksoi më tej Lubonja.
Ai shtoi se me mënyrën sesi po vepron politika në vend, shqiptarëve iu ka mbetur vetëm largimi nga vendi. “Të vetmit që po përpiqen të bëjnë ndryshime të situatës politikë janë Ben Blushi dhe Gjergj Bojaxhi, por dhe partitë e tyre nuk janë të konsoliduar akoma deri më tani. I vetmi ndryshim është emigrimi dhe largimi i shqiptarëve nga vendi”
