Nënkryetari i Lëvizjes Socialiste për Integrim, Luan Rama ka dalë sot në një konferencë për shtyp, ku ka theksuar objektivin e LSI për të dalë forcë e parë.
Rama u shpreh se kundërshtarët e kësaj force politike i frikësohen rritjes së LSI-së, ndërsa tha se garon me PS-në për të dalë forcë e parë në Tiranë, Durrës, Elbasan dhe Fier.
Më poshtë fjala e Ramës:
“LSI është rritur, ndërsa kundërshtarët frikësohen. Ngushëllime kundërshtarëve. Ftoj kandidatët e LSi të kenë në fokus qytetarët dhe përmirësimin e jetës së tyre. LSI është në garë për vendin e parë dhe të bindur se do dalim në vendin e parë, nuk na intereson farë se çfarë thonë, mendojnë, apo bëjnë të tjerët.
LSI forcë e parë do të thotë drejtim i ri, me taksa më të ulëta. Nuk po menaxhojmë dot frikën e kundërshtarëve ndaj rritjes së LSI, nuk merremi me ata që garojnë për vendin e tretë.
Ne kemi qenë në qeverisje me PS-në si garanci e stabilitetit dhe reformave në kuadër të procesit të integrimit të vendit. Oferta jonë është për një drejtim të ri të qeverisë, për atë drejtim që duan qytetarët larg arrogancës dhe abuzimeve. Listat e LSI-së janë bërë duke pasur parasysh vetëm përfaqësimin dinjitoz të qytetarëve, duke respektuar me seriozitet kuotat gjinore.
LSI në Tiranë është e barabartë në garë me Partinë Socialiste. Luftojmë përballë PS-së për vendin e parë në tiranë, Durrës, Elbasan dhe Fier. Jemi absolutisht të parët në Gjirokastër dhe Berat.”/ Tirana Today
