“Luajnë pak dhe flasin shumë”/PSG largon spiunin e parë

PSG ka surprizuar me largimin e Lucar Moura në orët e fundit të merkatos, duke e dërguar atë në radhët e Tottenham. I shumëkërkuar në merkatot që lamë pas parisienët asnjëherë nuk kishin pranuar negociata për brazilianin, por këtë herë duket se ka qenë klubi ai që ka marrë vendimin. E përditshmja franceze “Le Parisien”, ka publikuar një artikull ku pasqyron largimin e tij për motive të pazakonta.

Moura duket se ishte tipi i lojtarit që luan pak dhe flet shumë, e duket se kjo është arsyeja që ka detyruar klubin ta largojë. 25-vjeçari ishte një thashethemexhi i thekur, një spiun, ai që konsiderohej burim i sigurt brenda dhomave të zhveshjes nga mediat, por që në fakt përçmohet për këtë ves nga trajneri dhe shokët e tjerë të skuadrës. Ai fliste me gazetarët, zbulonte sekrete të grupit, incidentet apo hatërmbetjet, duke thyer në mënyrë të hapur rregullin e parë të një grupi të unifikuar, ajo që ndodh në dhomat e zhveshjes mbetet aty.

Lucas Moura dhe Ben Arfa, me këtë të fundit i cili vijon të qëndrojë te PSG, përbënin dyshen që thyente këtë rregull. Prandaj klubi i Parisit ka qenë më se i lumtur t’i hapte dyert e largimit brazilianit, jo për arsye financiare apo teknike, por thjesht disiplinore dhe etike. Një tentativë kjo për të rikthyer qetësinë dhe klimën e mirë brenda grupit.