Shtetet e Bashkuara dhe Mbretëria e Bashkuar e kanë akuzuar Rusinë se ka shkrepur një lloj rakete nga një satelit në hapësirë, raporton BBC.
Kreu i drejtorisë hapësinore në Mbretërinë e Bashkuar, Harvey Smyth tha: “Ne jemi të shqetësuar nga mënyra me të cilën Rusia testoi një nga satelitët e saj duke lëshuar një predhë me karakteristikat e një arme”.
Smyth, gjithashtu pohoi se veprime si këto “rrezikojnë të shkaktojnë mbeturina që mund të përbëjnë një kërcënim për satelitët dhe sistemet hapësinore nga të cilat varet bota”.
“Ne i bëjmë thirrje Rusisë që të shmangë çdo testim të mëtejshëm. Ne gjithashtu i kërkojmë Rusisë të vazhdojë të punojë në mënyrë konstruktive me Mbretërinë e Bashkuar dhe partnerët e tjerë në drejtim të një sjelljeje të përgjegjshme në hapësirë”, tha Smyth.
SHBA-ja u shpreh se sistemi satelitor rus ishte i njëjti, për të cilin kishte ngritur shqetësime në vitin 2018, si dhe në fillim të këtij viti, kur ai bëri një manovrim afër një sateliti amerikan, shkruan “Rel”.
