Detaje të reja janë zbardhur pas atentatit në Lushnje, ku mbeti i plagosur Saimir Taullahu. Shënjestra e atentatit mësohet se është larguar nga spitali, i shoqëruar me forca policie. Ende nuk ka një informacion për vendndodhjen e tij.
Ai ka marrë mjekim në spitalin e qytetit, për një plagë në kokë dhe një plagë në shpatull mbrëmjen e shkuar. Po mbrëmë është larguar nga spitali. Taullahu konsiderohet armik i të ashtuquajturës Bandës së Lushnjes, të drejtuar nga Aldo Bare.
Disa të shoqëruar
Uniformat blu kanë shoqëruar disa persona për atentatin, por ende nuk ka të arrestuar. Për rastin janë marrë në pyetje dëshmitarët në lokalin ku i bënë atentat 47-vjeçarit.
Autorët dyshohet se u larguan me motor. Në hyrje- daljet e qytetit janë ngritur pika të shumta kontrolli, me qëllim kapjen e autorëve të dyshuar.
Grupi hetimor po punon për zbardhjen e plotë të saj, si edhe identifikimin e autorëve, të cilët dyshohet se u larguan me motor në drejtim të Elbasanit.
Drejt Lushnjes mësohet se janë nisur edhe forca speciale nga Tirana, që janë vënë në kërkim të autorëve.
