Pas reagimit të vetë kryeministrit Rama, deputeti socialist Ulsi Manja në një deklaratë për mediet, i ka kërkuar Lulzim Bashës që të japë shpjegime për lobimin rus në SHBA për ta siguruar takime në Uashington.
Manja tha se Basha nuk ka si shpëton pa i dhënë llogari drejtësisë shqiptare, por edhe asaj amerikane.
“Kjo histori nuk mund të kalojë me ndonjë deklaratë, pasi ne kërkojmë shpjegime publike nga Lulzim Basha. Kërkojmë shpjegime jo në emrin tonë, por të çdo shqiptari.
Ne nuk i ndahemi kësaj historie pa marrë përgjigje. Lulzim mos u fshih, por duku, dil e jep përgjigje. Nesër për këtë histori do të përgjigjet para ligjit, këtu dhe rrezik edhe në Amerikë. Dje Basha gënjeu publikisht se nuk ka lidhje me kompanitë.
Në prag të fushatës, PD e drejtuar nga Basha lidhi dy kontrata në SHBA për të siguruar takime të nivelit të lartë në DASH, rreth një milionë dollarë për një foto me Presidentin Trump. Pagesat u bënë përmes dy kontratave të lidhura në fund të marsit me 675 mijë dollarë”, tha ndër të tjera Manja.
Artikulli i “Mother Jones” tregon se si Basha ra në kontakt me kompaninë ruse për të paguar lobistin Nick Muzin, i cili do ta reklamonte në Uashington. Por, sipas PD-së, ky artikull është një mashtrim i sponsorizuar nga vetë Rama për të larguar vëmendjen nga krimi dhe droga.
