Kryetari i Partisë Demokratike, Lulzim Basha ka dalë nga Prokuroria e Tiranës, ku është thirrur për hetimin lidhur me dosjen e lobimit.
Në një prononcim për mediat, Basha tha se hetimi lidhet me formularët e dorëzuar në Komisionin Qendror të Zgjedhjeve, ndërsa shtoi se letërporositë vërtetojnë se nuk është shkelur ligji. Në mbyllje të fjalës së tij, kryedemokrati deklaroi se i ka kërkuar Prokurorisë që të bëjë publike përgjimet e ardhura nga SHBA.
“Jemi thirrur sot për të dhënë informacioni si persona që mund të kenë dijeni për rrethanat e hetimit. Hetimi bëhet mbi bazën e nenit 110, cështja që po hetohet lidhet me formularët e dorëzuar në KQZ, hetimi është për të vërtetuar nëse këto formularë janë mbushur apo jo siç duhet. Kjo është e vërteta, jo ajo që qeveria e inskenon politikisht. Ka një vit që është hapur ky hetim, PD nuk ka shkelur asnjë ligj. I kemi kërkuar prokurorisë që të bëjë publike letërporositë e ardhura nga SHBA”, tha Basha./ Tirana Today
