Ministri i Brendshëm, Sandër Lleshaj ka bërë të ditur se është vendosur rihapja e procesit të pajisjes me karta identiteti dhe me pasaporta biometrike.
Përmes një postimi në Facebook, Lleshaj sqaroi se nga java e ardhshme aplikimet do të bëhen vetëm pasi personat e interesuar të marrin një orar paraqitjeje pranë zyrave përkatëse të Komisariateve të Policisë.
Sipas tij, orari i aplikimit për këto dokumente do të përcaktohet në portalin e Ministrisë së Brendshme.
Postimi i plotë:
Ka filluar shpërndarja e pasaportave dhe kartave të identitetit. Tërheqja e tyre mund të kryhet vetëm pasi qytetarët të njoftohen nga zyra përkatëse, ose pasi të interesuarit të lënë një takim paraprak për këtë qëllim. Po ashtu kanë filluar aplikimet e reja për kartat e identitetit dhe pasaportat e udhëtimit.
Nga fillimi i javës së ardhshme aplikimet do të bëhen vetëm pasi personat e interesuar të marrin një orar paraqitjeje pranë zyrave përkatëse të Komisariateve të Policisë dhe atyre të aplikimit.
Orari i aplikimit për të dy dokumentet do të përcaktohet në portalin e Ministrisë së Brendshme.
Me masat e reja shënohet një hap tjetër drejt lehtësimit të shërbimeve publike, i cili do të shoqërohet me masat e nevojshme të sigurisë ndaj COVID-19.
