Mbrëmjen e kaluar, në protestën e opozitës së bashkuar ka pasur disa të lënduar. Ish-kryeministri Sali Berisha ka publikuar sot pamje të një babai e birit të tij nga spitali, të dy të dhunuar dhe me shenja në trup. Berisha në përshkrim akuzonte policinë se ka dhunuar protestuesit.
Por, menjëherë ka reaguar ministri i Brendshëm, Sandër Lleshaj, i cili ka postuar një video ku kamerat kanë kapur momentin ku atë e bir në fakt nisin të përleshen me protestues të tjerë, e më pas plas sherri ku përdoren edhe shufra hekuri.
Teksa poston videon në Twitter, Lleshaj shkruan se ‘akuzat monstruoze ndaj policisë rezultuan në një blof të turpshëm, të ngjashëm me atë të çadrave pistoletë të 2011-ës”:
“Nga frymëzuesit dhe ekzekutuesit e dhunës së mbrëmshme, tashmë duhet një përgjigje publike për insinuatën e akuzave monstruoze kundër Policisë, që rezultuan në një blof të turpshëm, të ngjashëm me atë të “çadrave pistoletë” të 2011-ës.”
Lidhur me këtë rast ka reaguar shkurt edhe kryeministri Rama, i cili publikon videon dhe shkruan: “Barbari, pabesi, turp”.
