Ministri Sandër Lleshaj ka shuar kureshtjen në lidhje me disa detaje sa i takon supergrabitjes në Rinas. Ai thotë se i duhet lënë në dorë organeve që po hetojnë, për të hedhur dritë mbi ngjarjen në aeroportin e Rinasit.
Do të jenë këto hetime që do të saktësojnë nëse Admir Murataj është vrarë nga policia, apo jo. I ftuar në “Repolitix”, ministri thotë se nuk është interesuar të dijë se si shkojnë hetimet. Ndër të tjera, Lleshaj theksoi se nuk ka arsye që shefin e bandës ta vrasin shokët në aksion e sipër.
“Zërat në media është e kotë të komentohen, ose media fantazon, ose media ka marrë informacione sekrete nga një dosje që është në hetim. Sa i përket dosjes nuk kam dijeni, nuk kam kompetencë të kem dijeni për dosjen. As mund t’i pohoj, as ti mohoj ato që thotë media. Unë besoj se janë fantazi, se kam besim tek integriteti i njerëzve që po merren me hetimin.
Ka pasur një deklaratë të policisë që i mohon këto. Kam thënë që banda ka marrë një goditje shkatërruese, sepse njëri nga anëtarët e saj ka mbetur i vrarë. Është një supozim i madh që ministri i fut hundët në dosje, e para nuk më lejohet, e dyta nuk jam i interesuar, sepse nuk më intereson në nivelin edhe personal.
Kureshtja ime orientohet në drejtime të tjera. Nuk mund të them se kush e ka vrarë Admir Murataj, kjo është një çështje që do të dalë nga hetimet.
Nuk ka arsye që shefin e bandës ta vrasin shokët në aksion e sipër. Vrasja e tij është ende e panjohur për sa kohë nuk është mbyllur hetimi. Kureshtja e madhe në këtë drejtim, i mirëkuptoj gazetarët, por kam parë një diskutim malinj në ditët e para që u munduan të rrëmojnë se kush nga policët e ka bërë këtë”, tha Lleshaj.
