Deputetja e Lëvizjes Socialiste për Integrim, Silva Caka ka akuzuar ministren e Shtetit, Elisa Spiropali për vjedhjen e 350 mijë dollarëve. Në një postim në Facebook, Caka i referohet një shkrimi, ku thuhet se bashkëshorti i Spiropalit ia dha tenderat vëllait të ministres.
“Me bekimin politik të saj, 3 këmbët e perustisë Spiropali-Totaj-Memushaj (vëllai, burri dhe kushëriri i burrit të Ministres), vjedhin 350 mijë $”, shkruan ndër të tjera deputetja.
Postimi i plotë:
“Llaxore te dera, dil se të erdhi vera… Nga karrigia e pushtetit, është shumë e thjeshtë të bësh arroganten dhe të vjedhësh paratë e shqiptarëve, me mënyra të paskrupullta dhe skema të trasha. Në këtë link, faktohet kristal e qartë vjedhja familjare e 350 mijë $, nga bashkëshorti, vëllai dhe krushku i Ministres së Shtetit për Marrëdhëniet me Parlamentin. Me bekimin politik të saj, 3 këmbët e perustisë Spiropali-Totaj-Memushaj (vëllai, burri dhe kushëriri i burrit të Ministres), vjedhin 350 mijë $, duke treguar edhe një herë se kjo qeveri punon vetëm për Kryeministrin, ministrat, familjarët e tyre dhe klientët e pushtetit. Ndërkohë, dosjet e korrupsionit në Dogana, faktuar nga raportet e Kontrollit të Lartë të Shtetit, flenë në Prokurori. Llaxore nga vulgu, dil se të erdhi burgu”, shkruan Caka.
