Prokurori i Përgjithshëm Adriatik Llalla ka mbërritur para pak minutash në Prokurorinë e Vlorës.
Llalla mbërriti në Vlorë pas ngjarjeve të fundit, ku në orët e para të së enjtes u krye një operacion në Babicë të Vlorës, ku u sekuestruan rreth 4 ton drogë, e cila dyshohet se i takon bandës së Habilajve.
Llalla është pritur nge prokurori Ramadan Troci, ndërsa mendohet se gjatë takimit do të diskutohet edhe për dosjen “Habilaj” dhe përgjimet e trafikantëve nga autoritetet italiane.
Kryeprokurori Llalla shoqërohet nga drejtues të Prokurorisë së Krimeve të Rënda, ndërsa pas këtij takimi ai do i drejtohet edhe Prokurorisë së Lushnjës.
Edhe kryedemokrati Basha përgëzoi Prokurorinë e Krimeve të Rënda për operacionin në Vlorë, ndërsa bëri thirrje për ndalimin sa më parë të të implikuarve në dosjen Habilaj, më në krye Saimir Tahirin.
