Histori që mund të kishin ndodhur, por që nuk u realizuan. Më mirë kështu, për të gjithë. Cristiano Ronaldo vështirë të kishte bërë më mirë se kaq gjatë të gjithë karrierës së tij. Më mirë kështu, për të gjithë. Përveç tifozëve të Liverpool. Fenomeni portugez kishte qenë vetëm një hap larg transferimit të tij te Liverpool, para se të transferohej te Manchester United. Rrëfimi mban firmën e Gerard Houllier, ish-trajner i të “Kuqve” për gjashtë vite 1998-2004: “Mund ta kishim blerë, por kishte kërkuar shumë në pagesë. Kishim frikë se mos prisheshin ekuilibrat brenda ekipit…”, ishte ky thelbi i fjalëve të ish-trajnerit të Liverpool.
Gerard Houllier zbulon dinamikën e tratativave për transferimin e dështuar. Pas katër “Topave të Artë”, me siguri te Liverpool po hanë duart nga inati. “E pashë në turneun Tolone U-21, shkuam atje posaçërisht për atë, por nuk deshëm t’ia plotësonim dëshirën e tij financiare, për shumën që kërkonte. Pranova të mos prish ekuilibrat në strukturën e pagesave të kontingjentit. Mendova se do të shkaktonte probleme të mëdha brenda dhomave tona të zhveshjes”, deklaroi Houllier në shenjë pranimi të fajit.
“Mbase me Cristiano Ronaldo mund të kishim fituar titullin, por blemë Harry Kewell, që në atë moment ishte një futbollist i shkëlqyer dhe që kishte shumë uri. Fatkeqësisht pësoi një dëmtim të rëndë. Manchester United? “Djajtë e kuq” luajtën miqësore ndaj Sporting Lisbona dhe të gjithë futbollistët shkuan te Sir Alex Ferguson duke i thënë se duhej ta blinte me çdo kusht, dhe ashtu ndodhi”, përfundoi Houllier.
