Një ditë më parë, teksa mori fjalën në Kuvend, kreu i qeverisë Edi Rama i ka mëshuar faktit se listat me të dhëna të personave me shtetësi shqiptare të bëra publike nga grupi i hakerave “HomeLand Justice” që pretendohet se janë të dhëna të dala nga sistemi MEMEX, janë fotomontazh. Ai iu është përgjigjur opozitës, se asnjë e dhënë sensitive nuk është në dorë të hakerave. Sa i përket listës së publikuar nga hakerat, me emrat e dy ministrave, Niko Peleshi, Elisa Spiropali dhe ish-ministres Mimi Kodheli, Rama tha se është e fotomontuar.
Kreu i qeverisë fajësoi opozitën se kontribuojnë në dezinformime të publikut, duke ngritur çështje pa vlerë dhe hipotetike për diskutim. “Dhe e fundit që kam, mos bëhemi qesharakë që për çdo gjë që ndodh, çdo gjëje që ndodh, i japim një unikalitet sikur kjo ndodh këtu.
Sot që flasim, prej disa kohësh në shtetin fqinj, në Maqedoninë e Veriut, ka një agjenci të tërë pagesash të Ministrisë së Bujqësisë që nuk punon, për shkak se është marrë peng nga hakerat. Sulmet kibernetike janë një e përditshme. Ne jemi marrë me sulmet kibernetike të vazhdueshme, dhe s’kemi pasur asnjëherë asnjë problem. Ky është një sulm i një niveli shumë të lartë, i një agresiviteti shumë të lartë dhe nuk e ka realizuar qëllimin e tij.
Tani, mbase ju do donit ta realizonte qëllimin, po nuk e ka realizuar. Mbase ju do donit realisht të kishte sjellë një hata, po nuk e ka sjellë një, mbase ju do donit të na kishte gjetur tërësisht të papërgatitur, po nuk na ka gjetur. Kështu që mos u kuturisni në konkluzione që janë qesharake, dhe po ju them prapë, që ai sulm nuk e ka realizuar qëllimin, është shumë e thjeshtë. Bëjnë “hajgare” hakerat me ju që ngriheni në këmbë me fotomontazhe”, tha ai.
