Prokuroria e Posaçme ka mbyllur hetimet për gjyqtaren Enkeleida Hoxha dhe 9 të hetuarit e tjerë të dosjes së korrupsionit në burgje. Sot pritet që ti komunikohen akuzat zyrtare. Sipas SPAK, Enkeleida Hoxha dhe avokati Aldo Tabaku, duke bashkëpunuar edhe me persona të tjerë të implikuar ne dosje, janë përfshirë në një skemë kriminale të favorizimit dhe lirimit të të burgosurve nga Gjykata e Krujës.
Ish-gjyqtarja Hoxha u arrestua nga SPAK, pas një operacioni të zhvilluar në Gjykatën e Krujës, gjatë seancës gjyqësore, teksa po lironte një tjetër të dënuar.
Emri i gjyqtares lidhet me lirimin e shumë të dënuarve me burg përjetë, mes tyre edhe Endrit Dokle, Genc Tafilit dhe Hekuran Billa, i vrarë disa muaj më parë në Tiranë. Këshilli i Lartë Gjyqësor shkarkoi nga detyra Enkeleida Hoxhën më 17 mars, e akuzuar se ka shkelur detyrën në lirimin e disa të dënuarve me burgim të përjetshëm, vendim të cilin Hoxha e ka apeluar.
Në dosjen e Prokurorisë së Posaçme janë një sërë përgjimesh dhe vëzhgimesh ambientale, që implikojnë të hetuarit, ndërsa vetë te akuzuarit kanë mbajtur qëndrim mohues.
