Gjykata e Fierit ka urdhëruar lirimin e menjëhershëm të ish-deputetit Mark Frrokut dhe ky i fundit la sot qelinë e burgut.
Për këtë vendim të gjykatës së Fierit ka reaguar edhe Partia Demokratike. Kjo parti deklaron se lirimi i tij është prova më e re se drejtësia është nën kontrollin e Edi Ramës dhe kupolës së tij mafioze. PD thotë se ka ardhur koha që njerëzit e zakonshëm të marrin në dorë fatin e tyre, duke dhënë një ultimatum: ose qeveria mafioze, ose Shqipëria.
Në deklaratën e PD-së për median shkruhet:
“Lirimi i ish deputetit të akuzuar për vrasje Mark Frroku është prova më e re se drejtësia është plotësisht nën kontrollin e Edi Ramës dhe kupolës së tij mafioze.
Kryegjykatësi Edi Rama liroi mikun e tij Mark Frroku duke vepruar njësoj si me vëllain e tij vrasës të kryekomisarit, Arben Frroku.
Lirimi i Mark Frrkut, familja mafioze Xhafaj, kompromentimi i hetimeve për Saimir Tahirin, kapja e plotë e prokurorisë janë fundi i shtetit ligjor në Shqipëri!
Në këto kushte i vetmi që mund të japë shpresë është populli. Ka ardhur koha që njerëzit e zakonshëm të këtij vendi, të cilët nuk duan të sundohen nga krimi, të marrin në dorë fatin e tyre. Ose qeveria mafioze e Edi Ramës, ose Shqipëria. Të dyja bashkë nuk mund të zgjasin më!”
