Lionel Mesi mbetet numri një i futbollit botëror, madje duke thyer rekorde e duke hyrë në histori si fituesi më i madh i kësaj loje në planin individual. Lionel Mesi është fitues i çmimit të madh “Topi i Artë”, dhënë nga revista “France Football” mbrëmjen e djeshme në një ceremoni gala, në një nga ambientet e teatrit kryesor të Parisit.
Ky është trofeu i shtatë për “Pleshtin”, i cili e ka fituar më parë “Topin e Artë” edhe në vitet 2009, 2010, 2011, 2012, 2015, 2019 dhe 2021. Mesi ishte i pranishëm në mbrëmje bashkë me familjen e tij, gruan dhe tre djemtë.
Ajo çfarë ka habitur, ishte deklarata e argjentinasit në momentin e marrjes së çmimit ku tregoi përulësi ndaj rivalit direkt Robert Levandovski duke u shprehur:
“Levandovski e meritoi ta fitonte “Topin e Artë” këtë vit, por kombëtarja ka peshuar shumë në këtë çmim. Shpresoj ta fitojë vitin tjetër. Nuk e di dhe sa vite më kanë mbetur në futboll, por shpresoj të fitoj dhe një tjetër trofe pasi është mjaft emocionuese”.
Deklarata ka marrë kritika, pasi Levandovski nuk mund të kalojë të njëjtin sezon si këtë aktual, dhe nuk mund t’i vijë më mundësia të fitojë “Topin e Artë”.
