Pas një viti mungesë si pasojë e pandemisë COVID-19, sot do të mbahet ceremonia e “Topit të Artë”. Teksa emocionet janë shtuar, pritet të mësohet fituesi i edicionit të 65-të të trofeut më prestigjioz individual për çdo futbollist. Ceremonia e dhënies së çmimit “Topi i Artë” për vitin 2021 do të zhvillohet në Paris.
“Topi i Artë” s’është i vetmi që do të jepet sonte në mbrëmje në Paris. Bashkë me të do të jepen edhe trofe të tjerë, tashmë të njohur për sportdashësit.
Kështu, do të jepet edhe trofeu “Topi i Artë” për femrat, trofeu “Kopa” për lojtarin e ri më të mirë dhe trofeu “Lev Jashin” për sportierin më të mirë.
Në garë për “Topi i Artë” janë 30 futbollistë, më të mirët në qarkullim. Gara ka qenë e fortë, por sipas të gjitha gjasave, favoriti numër një është Leo Mesi. Ylli argjentinas është fituesi i fundit i këtij trofeu dhe për disa nga mediat e rëndësishme në Europë ai shihet në avantazh.
Suksesi i tij me Argjentinën në Kupën e Amerikës e bën favorit, edhe pse ka nga ata që kanë fituar edhe më shumë se Leo gjatë këtij viti.
Pas gazetave spanjolle, dje ka qenë gazeta gjermane “Bild am Sonntag”, e cila ka dhënë një parashikim që e sheh Leo Mesin kandidat kryesor me 71.7 për qind mundësi suksesi. Rivali i tij është Robert Levandovski me 40.5 për qind shanse, ndërsa i treti Mohamed Salah me vetëm 2.9 për qind.
