Anëtarët e komisioneve të kongresit amerikan janë të etur të dëgjojnë dëshmitë e dhëndrit të Trump, Jared Kushner, është njëkohësisht një prej këshilltarëve kryesorë të presidentit.
Fillimisht disa organe të shtypit njoftuan se Jared Kushner ishte tashmë një person ku ishte përqëndruar interesi FBI-së në hetimet mbi ndërhyrjen ruse në zgjedhjet amerikane të vitit të kaluar. Më pas u publikuan shumë raporte ku pretendohej se përpara se presidenti Trump të merrte zyrtarisht pushtetin, zoti Kushner ishte përpjekur të krijonte një kanal të fshehtë komunikimi me Moskën, nëpërmjet ambasadorit rus në Uashington.
Të jesh “një person me interes” për hetimet, ashtu siç është zoti Kushner për FBI-në, nuk do të thotë që ke kryer ndonjë veprim të paligjshëm. Disa media njoftuan se zoti Kushner u përpoq të krijojë një kanal të fshehtë komunikimi me Rusinë për të diskutuar lidhur me çështjen e Sirisë si dhe tema të tjera të mprehta. Sipas zyrtarëve të lartë të administratës, kjo është një praktikë normale.
“Mendoj se në fund të fundit, do të duam që zoti Kushner të vijë përpara komisionit tonë. Pres që kjo të ndodhë. Jam i sigurt se edhe zoti Mueller do të donte të kuptonte më shumë rreth këtyre akuzave”, thotë ligjvënësi demokrat Adam Schiff.
