Ish-drejtori i Policisë së Shtetit, Haki Çako tashmë ka mbyllur kapitullin me organet drejtuese të këtij institucioni. Në bazë të Kushtetutës, ai nuk mund të luaj më role drejtuese në polici, ndërsa nuk i ndalohet mundësia për të dhënë këshilla dhe konsulencë, kur këto janë në dobi të interesit publik.
Kjo tregon se ai mund të kryej punë këshillimore, ndërsa rruga për t’u rikthyer në krye të Policisë së Shtetit është mbyllur përfundimisht. Sakaq, mbi bazën e ligjeve mbi Vettingut ku policia ka pranuar se ka problemet e veta ligjore, tashmë edhe në pikat e tjera të nenit 15 mbi Policinë e Shtetit, thuhet se “Drejtori i Policisë së Shtetit, pas përfundimit të afatit të qëndrimit në detyrë, nuk rikthehet në strukturat e Policisë së Shtetit. Në interes të shërbimit të rendit dhe sigurisë publike ai mund të kryejë funksione të tjera këshillimore ose pedagogjike. Pas përfundimit të mandatit, ish-Drejtori i Policisë së Shtetit gëzon trajtim të veçantë, të miratuar me vendim të Këshillit të Ministrave.
Pas shkarkimit nga detyra të drejtorit të Policisë së Shtetit, Haki Çako, në faqen zyrtare të kryeministrisë është shpërndarë arsyetimi ligjor për këtë veprim me firmë të kreut të ekzekutivit.Vendimi i Këshillit të Ministrave, për shkarkimin e Çakos është i bazuar në nenin 100 të Kushtetutës së Republikës së Shqipërisë, ndërsa ai është bërë edhe në bazë të nenin 15 të ligjit në lidhje me Policinë e Shtetit.
Në bazë të nenin 15 të Policisë së Shtetit, pika 3 theksohet “Lirimi dhe shkarkimi i Drejtorit të Policisë së Shtetit bëhet me vendim të Këshillit të Ministrave, me propozim të ministrit përgjegjës.
“Në mbështetje të nenit 100 të Kushtetutës dhe të pikës 3, të nenit 15, të ligjit nr.108/2014, “Për Policinë e Shtetit”, të ndryshuar, me propozimin e ministrit të Brendshëm, Këshilli i Ministrave, vendosi z. Haki Çako, Drejtor i Përgjithshëm i Policisë së Shtetit, lirohet nga kjo detyrë. Ky vendim hyn në fuqi menjëherë”-theksohet në vendimin e shpërndarë.
“Në projektligjin për Vettingun në Policinë e Shtetit dhe në gardë, policia pranon se ka probleme me korrupsionin, krimin dhe formimin e pamjaftueshëm profesional, që sjellin siguri të brishtë. Duke kopjuar afërisht ligjin për Vettingun në gjyqësor, edhe projektligji në Policinë e Shtetit mbështetet në tre komponentë, pastërtia e figurës, pasuria dhe vlerësimi profesional. “Është e vërtetë”, thuhet në relacionin shoqërues se ka mjaft policë të thjeshtë që janë proceduar për shkelje, por fare pak prej tyre janë zyrtarë të lartë të policisë që kanë pasur të njëjtin fat”-shkruan Top Channel.
Komisioni i Jashtëm i vlerësimit, Komisioni Qendror i Vlerësimit, Komisioni Vendor dhe i Posaçëm do të jenë organet e reja, që sipas projektligjit të Vettingut në polici, do të kalojnë në sitë 11 mijë efektivë të Policisë së Shtetit.Aty përfshihen që nga zinxhiri komandues deri tek inspektoret së bashku me 1 mijë efektivë të Gardës së Republikës si edhe rreth 100 punonjësit e ashtuquajtur Policia e Policisë, pra Shërbimi i Çështjeve të Brendshme dhe Ankesave. Përveç tyre, Vettingut mund t’i nënshtrohen me dëshirë edhe ish-punonjësit e policisë nën moshën 55 vjeç, përfshirë edhe të shkarkuarit nga detyra, por që gjykata u ka dhënë të drejtë, duke shfuqizuar urdhrin e shkarkimit.
