Në konferencën për media pas takimit me kancelarin gjerman, Olaf Scholz, kryeministri i Kosovës, Albin Kurti i mëshoi fort faktit se NATO-ja duhet të qëndrojë në Kosovë derisa Kosova të bëhet shtet anëtare e saj. Për të, prania e NATO-s në Kosovë është e domosdoshme, duke marrë shkas nga lidhjet e ngushta mes Serbisë dhe Rusisë dhe në aspektin ushtarak.
“Ushtria gjermane na ka ndihmuar për ta mirëmbajtur sigurinë dhe paqen, dhe kur kemi parasysh lidhjet e ngushta në mes Serbisë dhe Rusisë dhe në aspektin ushtarak konsiderojmë që prania e NATO-s në Kosovë është e domosdoshme. Kjo nuk do të thotë që ne nuk po investojmë në kapacitetet tona.
E kemi rritur buxhetin për 52 për qind për FSK-në, dhe tashmë buxheti ynë për mbrojtje është sa 1.3 për qind të bruto produktit vendor. Dëshirojmë të bëhemi anëtare në programin për partneritetin për paqe në NATO.
Vitin e kaluar kemi marrë pjesë në ‘Difender Europe 2021’, me 330 ushtarë në mesin e 16 shteteve nikoqire dhe do të marrim pjesë edhe në ‘Defender Europe 2023’. Por kemi nevojë për NATO-n në Kosovë, deri atëherë kur të bëhet Kosova në NATO. Nuk bën të bëhet asnjë vakum i paqes dhe i sigurisë”, tha ai.
