Nëse flasim për një shëndet mendor sa më të mirë të fëmijëve, atëherë padyshim libri shënon rekordin e dobive. Sipas mjekëve, libri është thesari më i çmuar për të pasuruar botën e brendshme të njeriut, veçanërisht për të kultivuar vlera të dijes dhe qytetarisë.
Por, tek fëmijët rëndësia e tij rritet akoma më shumë, pasi të lexuarit ka ndikim të drejtpërdrejtë në zhvillimin mendor të fëmijës. Është pikërisht libri ai që nxit imagjinatën e fëmijës dhe e bën mendjen e tij të jetë më kreative dhe aktive, si dhe ndikon në rritjen e vetëbesimit.
Librat favorizojnë gjithashtu edhe zhvillimin e shkathtësisë. Shumë libra për fëmijë, të tillë si ata që u mësojnë alfabetin, shpjegojnë se shkronjat kur bashkohen formojnë fjalë! Po kështu është edhe çështja e leximit! Poezia me rimat e saj do të kontribuojë në rritjen e pasurisë fonetike të fëmijëve, pra në aftësinë e tyre për të dëgjuar, për të identifikuar dhe për të ripërdorur tingujt individualë në fjalët e folura.
Librat gjithashtu shërbejnë edhe për të përmirësuar gjuhën apo të folurin. “Leximi i një shumëllojshmërie librash sigurisht do t’u shërbejë atyre edhe në zgjerimin e këtij fjalori dhe në njohjen e strukturave të reja sintaksore. Libri do të kontribuojë edhe në përmirësimin e marrëdhënieve ndërpersonale të fëmijës”, shprehen psikologët./ Tirana Today
