Zbardhen detaje të reja në lidhje me vrasjen e Aris Papas, 34-vjeçarit shqiptar i cili u ekzekutua pasditën e djeshme në Sepolia të Athinës.
Viktima ka qenë një emër i njohur për policinë, teksa më parë ai kishte mundur t’u shpëtonte edhe dy atentateve të tjera, shkruan Protothema.
Mësohet se shqiptari mbante veshur gjithmonë një jelek antiplumb, i cili jo pak herë i shpëtoi jetën, por një gjë e tillë nuk ndodhi ditën e djeshme.
Po sipas medias në vendin fqinj, bëhet e ditur se autori i vrasjes ishte një person i shkurtër, i cili kishte veshur një kapele të bardhë dhe bluzë të kuqe. Ai iui afrua shqiptarit, ndërsa lokali ishte plot me njerëz, duke synuar kokën dhe gjoksin e 34-vjeçarit dhe qëlloi plot tetë herë.
Pasi kreu krimin me gjakftohtësi, autori eci deri tek rruga Amvrakia dhe hipi në një taksi duke u larguar nga vendi i ngjarjes.
Dyshohet se ekzekutimi ka ndodhur për një larje hesapesh mes bandave të trafikut të drogës që operojnë në qendër të kryeqytetit grek.
