Pas triumfit të revolucioneve demokratike në disa vendeve të bllokut lindor komunist, dhe disa incidenteve në vend, Sigurimi i Shtetit, e kishte rritur ndjeshëm vigjilencën e tij.
Mund të duket e pabesueshme, por një ndihmë në këtë drejtim, ia dha CIA amerikane. Një dokument i Drejtorisë së tretë të Sigurimit të Shtetit, bën me dije se një “kuadër” i CIA-s, e informoi parprakisht Sigurimin e Shtetit për nisjen e protestave të studentëve në dhjetorin e vitit 1990.
Dokumenti mban datën 13 nëntor 1990, pra gati 1 muaj para protestave studentore, që nisën mbrëmjen e 8 dhjetorit. Sipas përmbajtjes së dokumentit, “kuadri” i CIA-s paralajmëronte se para apo pas festave të nëntorit “studentët në Shqipëri, mund të organizonin një demonstratë për shkak të kushteve të vështira të studimit, fjetjes, ushqimit”. “Ata mund të dalin edhe me kërkesa për ndryshimin e programeve mësimore, dhe me ta mund të bashkohen edhe të rinj të tjerë”- thuhet më tej. Në vijim, paralajmërohej shmangia e ceremonive të zakonshme. Nisur nga këto sinjalizime, krerët komunistë të vendit, i evituan grumbullimet festive apo sportive. Ndërkohë, policia shpërndau me dhunë tubimin e studentëve mesditën e 9 dhjetorit, për të shmangur bashkimin me tifozët e “17 Nëntorit” (sot Tirana), që po shkonin të ndiqnin ndeshjen në stadiumin “Qemal Stafa”./ TIRANA TODAY
