Ndryshimet tek Milani pas largimit të presidencës kineze ishin të mëdha. Fillimisht u emërua një president i ri dhe më pas erdhën shkarkimi nga detyra edhe i Fassone e Mirabellit, pavarësisht se ata kishin edhe shumë vite kontratë me kuqezinjtë.
Masimiliano Mirabelli ka konfirmuar largimin nga Milani me anë të një letre, ku shpreh dashurinë që ndjen për kuqezinjtë dhe për punën e përkushtuar që ka bërë. “Të dashur milanistë, kur vjen momenti për të thënë faleminderit, do të thotë se diçka që kishte nisur po mbaron… Punova me të gjitha forcat e mia për t’i dhuruar tifozëve të Milanit më të mirën e mundshme, sepse populli milanist e meriton të kthehet në majën e Europës dhe të botës.
Unë jam i bindur se do të ktheheni atje me Gattuson, trajnerin që doja me çdo kusht. Më lejoni që këtë Milan ta ndjej edhe si një krijesë timen. Kam punuar pa pushim për një objektiv të vetëm, të mirën e klubit. I uroj suksese pasardhësit tim. Njerëzit ikin dhe vijnë, por Milan do të mbetet gjithmonë. Forca zemra e vjetër kuqezi!”, shkruan ai.
Mirabelli punoj më shumë se 1 vit për Milanin dhe vendimi për t’u larguar u mor pas një takimi me presidentin e ri Paolo Skaroni, vendin e tij do ta marrë braziliani Leonardo.
