17-vjeçari Paolo Ahmetcenaj, i cili u mbajt për tre ditë në ambientet e paraburgimit, për shkak se ishte pjesë e protestës, ka konfirmur se ndaj tij është ushtruar dhunë, ndërsa shumë prej oficerëve e kishin ngatërruar me Daniel Dobrajn. Ky i fundit dyshohet se ka qenë autori i plagosjes së efektives Ina Nuka. Në një intervistë ekskluzive për “Fax News”, ai ka treguar të gjithë peripecitë që ka kaluar. I riu ka thënë se një civil e kishte shtrirë në tokë, dhe më pas e ka dhunuar. Atë e kanë çuar tek rajoni nr 1. Aty e kanë goditur dhe i kanë ushtruar presion.
“Kam shkuar pak me vonesë, se isha në shkollë. Isha në reshtet e fundit të protestës. Një civil më ka shtrirë në tokë dhe më ka gjuajtur me shqelma. Ka pasur njerëz që kanë ardhur dhe ka lënë kapsolla në mes të rrugës, i mora dhe i futa në çantë. I doja që ti kisha te shtëpia, nuk kisha ndërmend që ti hidhja atë ditë.
Më mori babi në telefon, dhe më tha nisu për shtëpi. Dhe u nisa së bashku me xhaxhanë. Duke ikur për shtëpi, vjen një makinë e “Shqiponjave” dhe na ndalon para këmbëve, erdhën dhe disa motorë, po nuk po bënin asnjë veprim derisa erdhi një civil, që iu tha kapini këta. Më çuan te rajoni nr 1, na morën telefonat, së bashku me xhaxhain. Nuk më lanë që të telefonoja asnjë nga prindërit, deri në momentin që duhej firma.
Ka ardhur më pas babi, në rajonin numër 1 kanë qëlluar një prej personave të tjerë të shoqëruar. Nga aty na kanë çuar te Drejtoria e Policisë, vjen një civil duke na ofenduar. Vjen një civil dhe më pas më tregon një foto të Danielit, pasi dyshonin se isha ai. Një person erdhi në korridor dhe tha: Kush ishin ata që ofenduan policët, më ka gjuajtur me grusht në nofull, edhe pse i thashë që isha 17-vjeç. Tentoi sërish të më gjuante, dhe i mbajta dorën.
Personi që më gjuajti ka qenë rreth 27-vjeç, po nuk e mësova dot emrin e tij. Më nxjerrin foton e Danielit, po unë nuk e njihja dhe nuk kisha pasur asnjëherë kontakte me të. Për videon e Danielit këmbëngulnin se isha unë. Po më detyronin në njëfarë mënyre që të pranoja një gjë që nuk ishte e vërtetë, se unë kisha qenë pranë Danielit. Kam pasur një moment shumë të vështirë, po dridhesha.
Më gjuanin lehtë te faqja, një që ishte ulur në karrige tha: Lëre se na prish punë se është nën moshë. Më shtrëngonin në trup, dhe thonin: Hajde se do e shikosh se si do e hash! As nuk e mbaj mend se çfarë kam firmosur, herë pas here i ndryshonin dhe më bënin presion. Në dhomat e paraburgimit nuk kam ankesë, madje mua janë munduar që të më trajtojnë më mirë se të tjerët”, u shpreh i riu.
