Drejtuesi i Hekurudhës, Ani Dyrmishi hedh poshtë dyshimet për shpërthimin e lëndës plasëse në lagjen e tij.
“Unë nuk kam parking privat dhe lënda plasëse nuk lidhet me mua”, deklaron Dyrmishi.
Dyrmishi thekson se nuk është ndjerë kurrë i kërcënuar dhe se nuk ka konflikt me asnjë person. Në fund të deklaratës, ai kërkon nga organet hetimore që të zbardhin ngjarjen.
Sipas policisë së Durrësit, lënda plasëse ishte vendosur në afërsi të mjetit tip ‘Pasat’ në përdorim nga shtetasi A.D. me detyrë Drejtor i Përgjithshëm i Hekurudhave.
Deklarata e plotë e Dyrmishit:
Sot, si qytetar i Durrësit por edhe si person qe mbaj funksion drejtues pranë Drejtorisë se Përgjithshme te Hekurudhës Shqiptare, çmoj te arsyeshme te sqaroj opinionin publik ne lidhje me pasqyrimin ne media te gjetjes se një lende, te dyshuar si lende plasëse ne lagjen nr.4 te qytetit te Durrësit, lagje ku unë banoj.
Unë nuk disponoj vend parkimi privat, si rrjedhoje ne perditshmerine time, e parkoj mjetin ne vende parkimi publik.
Kurrë nuk jam ndjere i kërcënuar. Kam ecur dhe vazhdoj te ece i lire ne qytetin tim gjate gjithë kohës.
Figura ime si qytetar por edhe si drejtues i larte i HSH, kurrsesi nuk lidhen me ngjarjen e sotme.
Unë nuk kam asnjë konflikt personal apo konflikt ne lidhje me detyrën qe unë mbaj, Administrator i Përgjithshëm ne Drejtorinë e Përgjithshme te Hekurudhës Shqiptare.
Gjate ushtrimit të detyrës, kurdoherë jam mbështetur dhe do te vazhdoj te respektoj e zbatoj vetëm Ligjin sot dhe me te ardhmen.
Padyshim, nxis dhe pres nga organet ligjzbatuese te hetojnë e sqarojnë rrethanat e ngjarjes dhe te vihen përpara drejtësisë personat përgjegjës.
