Deputetët e Komisionit të Ekonomisë iu ka hyrë frika në palcë si asnjëherë tjetër. Sapo kanë ndjerë lëkundjet e tërmetit të fuqishëm prej 5 ballësh që përshkoi Tiranën dhe disa qytete të tjera deputetët e këtij komisionit janë gjendur në panik. Ndërsa kreu i këtij komisioni Erjon Braçe iu bën thirrje që të mos lëvizin nga vendi.
Në seancën e Komisionit të Ekonomisë ka qenë deputeti i Lëvizjes Socialiste për Integrim Përparim Spahiu i cili ndërsa ishte duke folur mbi shembjen ose jo të Teatrit Kombëtar, Spahiu theksoi se “më mirë ta shembë tërmeti se sa ta shembim ne”.
Pak minuta pas raportimeve të para të lëkundjeve të fuqishme ka qenë deputeti Tritan Shehu që shkroi se disa nga muret e zyrave të Kuvendit ishin çarë. Ndërsa bëri ironi duke theksuar se muret e Teatrit nuk lëvizën as nga dora e Zotit jo më nga kryeministri Edi Rama.
Megjithatë, në një lajëmërim rreth gjendjen së mureve të Kuvendit, zyra e shtypit e këtij institucioni njoftoi se muret e kësaj godine nuk kishin pësuar asnjë çarje.
Përpos kësaj, paniku përfshiu gjithë qytetarët e Tiranës të cilët dolën në rrugët e kryeqytetit dhe ata të qyteteve të tjera. Ndërsa frika kaploi edhe vetë deputetët e Komisionit të Ekonomisë të cilët ndërsa diskutonin mbi paratë e shqiptarëve, “u shkundën një herë edhe nga dora e Zotit”, ndoshta për t’ua kujtuar se lëkundjet e tërmetit janë të barabartë për të gjithë.
