Pritet që sot PS-ja të dalë me një reagim në lidhje me deputetin socialist Ornaldo Rakipi, pasi babai i tij Aqif Rakipi u shpall “non grata” nga SHBA-ja. Një ditë më parë, kreu i Grupit Parlamentar të PS-së, Taulant Balla konfirmoi se do të ketë një mbledhje të grupit ku ndër të tjera do të diskutohet për “fatin” e Ornaldo Rakipit në ulëset e Kuvendit.
Në 11 prill, Departamenti i Shtetit të SHBA-së publikoi vendimin për ndalimin e hyrjes në territorin amerikan të ish-deputetit të PS-së dhe PDIU-së Aqif Rakipi. Duke u bazuar nga të dhënat e Departamentit të Thesarit, DASH konstatoi se Rakipi është pjesë një grupi kriminal në Shqipëri, nëpërmjet të cilit ka ushtruar ndikim në politikë.
Zyra e diplomacisë amerikane e konsideron Aqif Rakipin një “ish-deputet famëkeq, i cili ka përdorur ndikimin e tij politik për të emëruar miqtë e tij në pozicione kyçe publike në Elbasan dhe Tiranë”.
Po ashtu DASH konfirmoi ndalimin e hyrjes në SHBA të Orlando Rakipit, dhe ngrirjen e pasurive e aseteve të tij në SHBA. “Duke qenë pjesë e familjes së Aqif Rakipit, atij (Orlando Rakipit) gjithashtu i ndalohet hyrja përgjithmonë në SHBA si dhe i ngrijnë asetet apo pasuritë që ai mund të ketë në Shtetet e Bashkuara të Amerikës”, shkruhet në deklaratën e DASH-it.
