Në kuadër të kupës së Gjermanisë, një ditë më parë ishte përballja Leipzig-Bayer Munchen, e cila u fitua nga këta ta fundit pas goditjes së 11-metërshave. Bayer kalon në fazën tjetër, por kjo ndeshje ka pasur shumë episode që nuk do të harrohen lehtë. Në Kupën e Gjermanisë nuk është aplikuar akoma “VAR”, gjë që ka munguar edhe në ndeshjen e mbrëmshme. Por në pjesën e parë një rast i dyshimtë për penallti që nuk u akordua nga arbitri, detyroi drejtorin sportiv të Leipzig, Ralf Rangik të zbriste në fushë me telefon në dorë pasi kishte filmuar gjithçka.
Kjo është një risi e re në botën e futbollit, që pas “VAR” në futboll janë futur edhe telefonat celularë. Por kjo lëvizje nuk u prit mirë nga lojtarët bavarezë, të cilët e kontestuan shumë këtë gjë pas ndeshjes.
Ka qenë Hummels që ka folur për këtë çështje, duke u shprehur se: “Nuk është e pranueshme që një drejtues të zbresë në fushë dhe t’i tregoj imazhe arbitrit. I kam thënë se ishte një sjellje antisportive. Ka nga ata që kanë thënë se ai faull ishte brenda zonës, të tjerë thonë se ishte jashtë. Unë besoj se penalltia që arbitri i ka dhënë Leipzig-ut në pjesën e dytë ka qenë një shpërblim, ia kam thënë edhe Zwayer, i cili ka qeshur. Sipas mendimit tim, ka qenë i detyruar ta japë atë penallti”.
Ndërsa nga ana tjetër trajneri i Leipzig e ka më shumë me arbitrin e takimit: “Nuk është mirë kështu, – ka thënë ai, para se të akuzonte gjithsesi arbitrin. – Zwayer e dha penalltinë duke qenë 4 metra larg, më pas është konsultuar me anësorin që ishte 40 metra larg dhe ka ndryshuar mendje. Arbitri ka dëmtuar ndeshjen, ndoshta ka dëmtuar dy: jemi nervozuar dhe kemi luajtur me 10 lojtarë për 75 minuta. Do të vuajmë pasojat edhe të shtunën”.
Ditën e shtunë do të ketë sërish një përballje mes këtyre dy ekipeve, por këtë herë në kampionat. Ndeshja do të zhvillohet në Munih dhe do të jetë i pranishëm sistemi “VAR”. Ajo që mungoi në sfidën e mbrëmshme dhe hapi kaq shumë polemika.
