Legjendat gjermane sulmojnë me fjalë të rënda Mesut Ozilin

Në kampin gjerman ka shumë trazira dhe emri që po sulmohet më shumë është i mesfushorit turko-gjerman, Mesut Ozil. Kritikat për të kanë filluar që nga momenti kur u publikuan foto me Erdogan dhe aq më keq që lojtari nuk doli asnjëherë në një prononcim për të sqaruar atë që ndodhi. Pas ndeshjes ndaj Meksikës, ku skuadra u mund me rezultatin 1-0, ai ishte i vetmi lojtar që nuk shkoi të përshëndeste tifozët, që ndodheshin në stadiumin “Luzhniki” të Moskës.Mario Basler ishte shumë kritik ndaj mesfushorit, duke e cilësuar atë si një bretkosë të vdekur, kjo për mënyrën se si luan në fushën e lojës. “Është për të ardhur keq, kam vite që ju them se mënyra se si luan Ozil është njësoj si një bretkosë e vdekur. Kur shoh golin e shënuar nga kundërshtari që kaloi Ozilin në mënyrë të turpshme, mund të them që ky nuk është një lojtar që udhëheq skuadrën”, u shpreh Basler.Nuk ishte vetëm Basler ai që kritikon Ozilin. Lotar Mateus ishte gjithashtu i zhgënjyer nga paraqitja e mesfushorit. “Kur shoh Ozilin që vrapon ashtu në fushë, mendoj që nuk ndihet mirë në uniformën e kombëtares”, ishte shprehur Lotar. Kjo deklaratë e tij u mbështet nga Basler që shtoi: “Ozil luan aq keq, sa do të ishte një lojtar i mirë për “TUS Vermelskirchen” (një skuadër amatore në Gjermani). Aty e ka vendin një lojtar i tillë. Ai nuk e ndihmon dot skuadrën për të mbrojtur titullin. Si mund ta bëjë me këtë mënyrë lojën? Nuk e kuptoj pse trajneri Lëv e aktivizon që nga minuta e parë.“Një ndeshje të madhe individuale të Ozilit nuk kemi për ta parë kurrë. Ai shënon ndaj Luksemburugut, por jo ndaj skuadrave të mëdha”, tha Basler. Këtë pohoi edhe Mateus për “Bild”. “Kur skuadra luan mirë dhe vrapon, atëherë është mirë edhe Mesut. Kur gjërat shkojnë keq mbrapa, atëherë ai dorëzohet. Ai është një lojtar shumë i mirë, por bën shumë pak. Duhet të jetë një lider”, tha lojtari me më shumë prezenca në kombëtaren gjermane. Basler e ka cilësuar atë gjithmonë si një lojtar të mbivlerësuar nga opinioni publik. Ozil, sipas tij, kurrë nuk është ngritur në nivelin e një lideri, edhe kur fitoi Kampionatin Botëror në Brazil, në vitin 2014.