Këtë të diel në rubrikën “Shihemi në Gjyq” në programin “E Diela Shqiptare” u ballafaqua një çift nga një fshat i Durrësit, të cilët jetojnë prej vitesh të ndarë për shkak të emigracionit.
Anila Bushi, akuzon bashkëshortin e saj Qemalin se nuk po kryen detyrimet familjare duke u kujdesur për qetësinë e saj dhe të tre djemve, më i madhi i të cilëve vetëm 16-vjeç. Problem për marrëdhënien mes çiftit është bërë një tokë e blerë nga Qemali në vitin 1998 në Durrës, aty ku kanë ndërtuar edhe një shtëpi.
Anila pretendon se vëllai i Qemalit, Sytkiu, e ka “riblerë” këtë pronë në vitin 2013 duke i paguar sërish para pronarit, nga i cili e kishte blerë edhe Qemali, dhe gjysma e shtëpisë së saj ka mbetur në pronën e Sytkiut.
Por duket se 38-vjeçares përveç pronës, nuk i intereson asgjë, as bashkëshorti i saj. Sipas saj largësia prej shumë vitesh dhe fakti që Qemali vazhdimisht mbron vëllezërit, dhe nuk i qëndron në krah gruas dhe fëmijëve ka sjellë edhe ftohje në çift dhe e ka bërë martesën e tyre jo-funksionale.
Anila shtoi se nëse do Qemali mund të ketë edhe një jetë tjetër në Suedi, ku është shpërngulur pas shumë vitesh në Greqi ndërsa Qemali nga ana tjetër pohon se mund të ketë lidhje jashtëmartesore.
Pjesë nga dialogu mes tyre:
Anila: Edhe dashnore le të ketë zonja Eni. Nuk më intereson. Dua që të ndalet konflikti.
Eni Çobani: Aaa. Nëse ju jeni e sigurt që ai ka një jetë tjetër atje, është shumë e rëndë kjo. Juve po ju akuzon bashkëshortja shumë rëndë zoti Qemal. Keni një jetë tjetër në Suedi? Nuk besoj.
Qemali: Po emigrantë jemi, të lirë jemi atje. A mund të më thuash një emigrant që nuk ka dikë.
Anila: Shikoje zonja Eni. Dhe unë me 3 fëmijët këtu.
Eni Çobani: Tani unë jam pa fjalë. Nëse të gjithë emigrantët…e thatë për shaka besoj.
Qemali: E thashë për shaka zonja Eni.
Eni Çobani: A për shaka, por gjysma e shakasë është e vërtetë kështu që…
Anila: Po, po, për shaka, nuk më intereson shakaja zonja Eni. Le të ketë edhe dashnore, nuk më intereson zonja Eni.
Eni Çobani: Besoj që emigrantët jashtë nuk shkojnë për këto qëllime. Shkojnë për të mira materiale për familjet që lënë këtu. Dhe i përshëndesim të gjithë emigrantët.
Anila: Zonja Eni, qetësia materiale është qetësia e familjes.
Eni Çobani: Po burri ka rëndësi për ty se s’po e dëgjoj fare burrin?
Anila: Nuk mundem zonja Eni, asnjë të drejtë nuk ka zonja Eni. Më ka lënë në mes të rrugëve me 3 fëmijë.
Qemali: A po dëgjon pak? Më duket në këtë mes ke faj edhe ti pak. Më fal, por dua me ta shpreh. Se këto gratë i ke bërë si nxitëse.
Ardit Gjebrea: 1 minutë se kjo më pëlqen tani. Mirë gjithë të tjerat, por më fal, na doli me faj edhe zonja Eni. Po pse?
Qemali: I ke bërë gratë nxitëse dhe ku do të shkojmë? Shkojmë tek Eni Çobani? Ju përgëzoj dhe je grua e hekurt, ama është shumë peshë u ke dhënë.
Eni Çobani: U jap dorë grave? Po mirë unë nuk marr vetëm gratë, por marr edhe burrat. Burri këtu më thotë zonjë, unë jam i lirë atje, do të bëj edhe një jetë tjetër, kjo zonja le të rrijë këtu. Si thau ti ta pranoj unë këtë?
Qemali: Ndoshta bëj edhe gabim dhe kërkoj ndjesë. Por më duket një gjë e tepërt ndaj grave kjo.
Eni Çobani: Unë po të isha në vendin e Anilës do ta kisha të vështirë të thoja bëj çfarë të duash. Unë s’jam nga ato që të them ty bëj çfarë të duash.
Anila: Zoti Ardit mua nuk më intereson fare. Fare nuk më intereson.
Ardit Gjebrea: Çfarë nuk të intereson?
Anila: Burri nuk më intereson fare. Fare, fare, fare.
Ardit Gjebrea: Si moj nuk të intereson burri?
Anila: Kam 3 djem si 3 yje. Përderisa ky nuk gjen një zgjidhje, që të jetojë gruaja me 3 fëmijët.
Ardit Gjebrea: Po sa vjeçe je ti?
Anila: 38.
Ardit Gjebrea: 38 vjeçe dhe s’të intereson burri?
Anila: Fare, sepse ma ka mbush kupën zoti Ardit.
Qemali: Ka mundësi të mbyllë pak gojën, që të mos i shkoj unë tek goja dhe t’ia mbyll. Se ia mbyll gojën unë. Po ta mbyllë pak gojën.
Anila: Ky është akoma me kohën e “Baba Qemos” Zonja Eni. Sundon gruan, mban vllazninë. Nuk i intereson gruaja me 3 fëmijët. Unë skam nevojë për këtë, të shkojë të jetojë me vëllezërit, me nënë, me kë të dojë. Kam 3 fëmijët e mi si 3 yje.
Në vitin 1998 Qemali ka blerë 4 dynym tokë, 2 prej të cilëve thotë se me t’u bërë pronar i rregullt, do ua kalonte vëllezërve. Por Anila pretendon se vëllai i Qemalit, Sytkiu, e ka “riblerë” një pjesë të madhe të kësaj prone në vitin 2013 duke i paguar sërish para ish-pronarit, dhe gjysma e shtëpisë së saj ka mbetur në pronën e pretenduar nga Sytkiu.
Anila: Dua që vëllai yt të mos më vijë të më trokasë tek dera, që është toka ime, është shtëpia ime. Nuk më intereson ti.
Qemali: Ta qepësh gojën jam duke të thënë edhe një herë.
Anila: Unë nuk e mbyll gojën se nuk jam memece ta mbyll gojën për të drejtat e mija. Se kam punuar emigrante 16 vjet. Kam lind 3 fëmijë. Kam kontribuar për ty. Mundesh me thanë ti që lekët e mija që i fitosha vetë në Greqi nuk kalonin në emrin tënd. Lekët e mija zoti Ardit kalonin në emër të atij.
(Qemali merr shishen e ujit dhe e gjuan drejt Anilës.)
Eni Çobani: Tani Qemal, të lutem.
Ardit Gjebrea: Qemal, jo të lutem, prit. Qemali është i nxehur sepse dëgjoi sjelljen e vëllait. Apo jo Qemal? Anila të lutem. Qemal, kam përshtypjen se ti u nxehe sepse dëgjove reagimin e vëllait tënd që tha kush është ky? Kështu që ti më shumë se me Anilën duhet ta kishe me vëllain tënd. Unë e kuptoj mërzitjen tënde.
Qemali: E kam me të dyja palët, sepse kur të vijë fundi as vëllain nuk e njoh, as gruan se njoh. Njoh vetëm fëmijët e mi.
Anila: Nuk duroj zonja Eni se kam punuar 16 vjet në Greqi dhe lekët kalonin në emër të tij, tani për çfarë jemi ne gratë këtu?
Eni Çobani: Ne jemi shtyllë e familjes, nuk diskutohet.
Anila: Skam nevojë për të fare.
Zonja Eni sqaroi se Ferdinand Zeka që ka marrë shumën e parave në vitin 1998, e njeh blerësin Qemal Bushi dhe thotë se në momentin që unë do të bëhem pronar do të bëj marrëveshjen me zotin Qemal Bushi, nëse unë nuk bëhem pronar, do t’i kthej shumën e parave. Asnjëra prej tyre vërtetë nuk ka ndodhur, por ama ka qëndruar vetëm një fakt, fakti i blerjes së kësaj prone të Qemalit nga Ferdinand Zeka.
“Sytkiu sillet sot si pronar dhe thotë zonjë unë i kam të gjitha dokumentet. Unë sot do t’i bëja vetëm një pyetje Sytki Bushit, të bëhesh burrë, të vinte të më takonte dhe të më sillte një dokumentet që të vërtetonte blerjen e kësaj prone nga Ferdinand Zeka. Zeka është gjallë, ndodhet në SHBA, i bëj thirrje nëse ndihet pjesë e kësaj problematike, qoftë edhe një telefonatë, s’po i kërkoj asgjë tjetër, një telefonatë të më bëjë dhe të më thotë si është e vërteta. Ia ka shitur për herë të dytë Sytki Bushit, apo njeh vetëm një blerës që është Qemal Bushi? Çudia kush është?Anila me të drejtë thotë se unë kam nisur një proces gjyqësor. Dhe Gjykata e Shkallës së parë e Durrësit, këta njerëz i ka njohur jo pronarë, sepse ka njohur Sytki Bushin. Unë Qemalit i them mos e lër këtë betejë.”
Zonja Eni i bëri me dije Qemalit se Gjykata e Apelit është shansi i tij i fundit. “Ti thua kemi Kuvendin dhe familjen, por këto punë zgjidhen me ligj, jo me kuvend. Drejtohu Gjykatës së Apelit, mos e lër pronën të të ikë meqë e ke blerë.”
Ardit Gjebrea: Qemali nuk ka marrë pjesë në asnjë prej gjyqeve.
Anila: Fare Zoti Ardit, në të gjitha kam marrë pjesë unë, ai ka qenë emigrant.
Ardit Gjebrea: Me Anilën sillesh si shqiptar, me vëllezërit don me u sjell si suedez. Sepse the që në Suedi nuk ka konflikte dhe duan që ta zgjidhin përbrenda familjes.
Vota e publikut tregoi se Anila ka të drejtë në pretendimet e saj ndaj Qemalit. Megjithëse vazhdimisht kundërshtoi t’i jepte dorën dhe ta përqafonte, me insistimin se diçka e tillë do ta bënte vetëm kur t’i jepet zgjidhja të gjithë çështjes, Anila si përfundim u dorëzua pas këmbënguljes së Ardit Gjebreas dhe e puthi bashkëshortin./tvklan.al
