Këshilli i Përgjithshëm i Lidhjes Demokratike të Kosovës mbrëmjen e kaluar shkarkoi Vjosa Osmanin nga pozitat që kishte në partinë në fjalë.
Mirëpo, së fundmi një “derë” i është hapur Osmanit nga Lëvizja Vetëvendosje, për t’u anëtarësuar.
Haki Abazi nga LVV, largimin e Vjosa Osmanit nga pozitat udhëheqëse brenda LDK-së e quan akt të turpshëm, ndërsa thekson se Vetëvendosje është e hapur për të gjithë ata që duan krijimin e një shteti demokratik me transparencë të plotë dhe llogaridhënie.
“Në parim, ajo ka mbështetur programin qeverisës, i cili është votuar më 6 Tetor dhe qëndrimi i saj parimor ndaj këtij premtimi që është bërë edhe nga Lëvizja Vetëvendosje edhe nga ajo, udhëheqëse e listës së LDK-së është në fakt një e mirëseardhur në diskursin publik, politik të vendit, sepse është për herë të parë kjo gjeneratë e përfaqësuar nga Kurti në LVV dhe deri tani për LDK-në nga Vjosa Osmani që premtimet u jepen qytetarëve mbahen gjatë gjithë kohës dhe provohen të mbahen deri në masën që është e mundur.
Bile edhe me një shtytje për të tejkaluar.
Sa i përket derës së hapur (për ardhjen e Vjosa Osmanit në VV), mendoj që Lëvizja Vetëvendosje e ka vërtetuar që është e hapur për të gjithë ata që mendojnë që mund të bashkëngjiten procesit drejt realizimit shtet-ndërtimit dhe krijimit të një shteti demokratik me transparencë dhe llogaridhënie”, u shpreh Abazi.
