Vizita e kryetares së Dhomës së Përfaqësuesve të SHBA-së, Nancy Pelosi në Tajvan pasqyron dëshirën e Uashingtonit për të provuar “mosndëshkimin dhe shfaqjen e paligjshmërisë së tyre”, tha të mërkurën ministri i Jashtëm rus, Sergey Lavrov, gjatë një konference për shtyp me ministren e Jashtme të Mianmarit, Wunna Maung Lwin, sipas agjencisë ruse të lajmeve TASS.
Lavrov e lidhi vizitën e Pelosit me përgjigjen e SHBA-së ndaj pushtimit rus të Ukrainës, duke thënë: “Nuk mund të them se cili ishte motivimi i tyre (amerikanëve), por nuk ka dyshime se ajo pasqyron të njëjtën politikë për të cilën po flasim në lidhje me Ukrainën”.
“Kjo është një dëshirë për t’i provuar absolutisht të gjithëve mosndëshkueshmërinë (e tyre) dhe për të shfaqur paligjshmërinë e tyre”.
Lavrov tha se ai nuk sheh ndonjë “arsye tjetër për të krijuar një irritues të tillë fjalë për fjalë nga askund, plotësisht i vetëdijshëm se çfarë do të thotë për Republikën Popullore të Kinës”.
Refuzimi i Kinës për të dënuar luftën e Rusisë ndaj Ukrainës ka nxitur spekulime mbi synimet e saj me Tajvanin, duke ngritur pikëpyetje se si mund të reagojë bota nëse ajo nis një sulm.
Të martën, Ministria e Jashtme ruse tha në një deklaratë se Rusia e konsideroi vizitën e Pelosit “një provokim të qartë në frymën e politikës agresive të Shteteve të Bashkuara, për një përpjekje të gjithanshme për të frenuar PRC (Republikën Popullore të Kinës)”.
Ministria i bëri thirrje gjithashtu Uashingtonit “të përmbahet nga veprimet që minojnë stabilitetin rajonal dhe sigurinë ndërkombëtare, dhe të njohë realitetin e ri gjeopolitik në të cilin nuk ka më vend për hegjemoninë amerikane”.
Burimi i lajmit: CNN. Përshtatur nga Tirana Today
