Pas kualifikimit të skuadrës së Skënderbeut në grupet e Europa League, një prej lojtarëve të saj më të rëndësishëm Liridon Latifi i dha dje lamtumirën ekipit korçar.
Latifi do të niset drejt Hungarisë ku do të jetë pjesë e klubit Puskas Academy. Lojtari i cili ka qenë vendimtar në ecurinë e “Ujqërve të dëborës”, tashmë do të tregojë potencialin e tij tek skuadra hungareze që mban emrin e Franc Pushkashit të madh.
“Normalisht jam emocionuar gjatë lamtumirës me shokët, kam bërë shumë për skuadrën. Skuadra ka bërë shumë për mua dhe unë jam munduar të shpërblej. Natyrisht të vjen keq të largohesh, por kështu e ka karriera. Primare ishte kualifikimi, sepse kur kualifikohesh ke shpërblime financiare, por edhe sportive. Do të vijoj ta ndjek Skënderbeun. Është ekipi i zemrës, sepse këtu kam hedhur hapat më të rëndësishme të karrierës dhe do të vazhdoj ta ndjek”, – deklaroi Liridon Latifi pas kualifikimit të Skënderbeut për në fazën e grupeve të UEFA Europa League.
Ndeshja ndaj Dinamos së Zagrebit ishte edhe e fundit për lojtarin i cili la gjurmë të mëdha tek Skënderbeu duke qenë vendimtar në kualifikimin e skuadrës korçare.
