Conor McGregor do të zbresë pas dy vitesh mungesë në oktogon për tu përballur me ish-mikun e tij rus, Khabib Nurmagomedov. 30-vjeçari është rikthyer për të rimarrë titullin kampion bote të peshave të lehta, i cili iu hoq nga UFC pasi nuk e kishte mbrojtur për një kohë të gjatë. Momentalisht ky çmim mbahet nga rusi dhe kjo ka sjellë një përplasje të fortë mes dy luftëtarëve për një kohë të gjatë. Përballja mes tyre konsiderohet si më e madhja në histori të artëve të përziera marciale.
Për të ndjekur këtë sfidë duhet të ndizni alarmin, pasi kjo përballje do të zhvillohet në orën 4 të mëngjesit të së dielës. Ndeshja më e madhe e UFC-së do të zhvillohet në T-Mobile Arena në Las Vegas, në vendin ku McGregor ishte mposhtur nga Floyd Mayweather.
Statistikat:
Khabibi ka patur një ngjitje graduale, duke mos njohur asnjë humbje në 26 përballjet në këtë sport, 8 prej të cilave janë fituar me “knock out”, ndërsa tetë të tjera pas dorzëzimit të kundërshtarit. McGregor ka fituar 21 nga 24 ndeshjet e zhvilluara në Artet e Përziera Marciale, 18 prej të cilave me “knock out”, sidoqoftë Mystic Mac numëron edhe tri humbje, me kundërshtarë si Artemij Sitenkov dhe Joseph Duffy në fillim të karrierës, por gjithashtu edhe me kalifornianin Nate Diaz, dy vjet e gjysmë më parë, pikërisht në Mekën e këtij sporti Las Vegas, që përfaqëson njëherësh edhe disfatën e fundit të 30-vjeçarit nga Dublini në UFC.
Favorit?
Shumica e ekspertëve favorizojnë paksa Nurmagomedovin, por në fund të gjithë pajtohen se rusi që aktualisht është i pamposhtur, nuk është i pandalshëm. Një natë më parë janë përfunduar edhe matjet e fundit zyrtare mes Khabib Nurmagomedov dhe Conor McGregor para duelit të tyre. Rusi peshoi 70.3 kilogramë (155lb), kurse irlandezi 70 kilogramë (154.5lb), pothuajse peshë identike, edhe pse Nurmagomedov është tre centimetra më i madh (1.78).
Ashtu siç e do tradita pas çdo matje të dy sportistët duhet të qëndrojnë përballë njëri-tjetrit dhe normalisht që kjo ishte pika më tensionuese. McGregor nuk arriti të mbajë vetën dhe për një moment tentoi ta godas me këmbë kundërshtarin e tij, por këtij të fundit nuk i bëri shumë përshtypje kjo pasi duket se është mësuar me spektaklin e Conorit.
Përballja në mes tyre është në kuadër të UFC 229, ku Nurmagomedov do ta mbrojë titullin e peshës së lehtë.
