Kryeministri Rama ka reaguar pas lajmit të hidhur, për ndarjen nga jeta të aktorit të mirënjohur Rikard Ljarja. “Lamtumirë mik”, shkruan Rama në një postim në Facebook, ndërsa ndan foton e “Dedës”, një prej roleve më të njohur të aktorit të ndjerë, në filmin “Rrugë të Bardha”.
Aktori dhe regjisori i mirënjohur Rikard Ljarja, u nda nga jeta mbrëmjen e kësaj të hëne, në moshën 77-vjeçare. Ai vuante prej kohësh nga një sëmundje e rëndë. Për të është planifikuar një ceremoni e vogël lamtumire, për shkak të situatës nga koronavirusi.
Aktori i mirënjohur i kinematografisë shqiptare, lindi në Shkodër. Në vitin 1965 u diplomua në Shkollën e Lartë të Aktrimit, “Aleksandër Moisiu”, Tiranë.
Ai e nisi karrierën si aktor në Teatrin “Migjeni” në Shkodër. Prej vitit 1973 deri në vitin 1996 ai ishte aktor, skenarist dhe regjisor i filmave të prodhuar nga kinostudio “Shqipëria Sot”.
Prej 1996-s deri në 2002-shin, ishte drejtor artistik në televizionin publik shqiptar. Ceremonia mortore do të zhvillohet në Shkodër.
