Gazetarja Klodiana Lala tha sot se kryeprokurorja e përkohshme Arta Marku ka bërë veprime të pa tolerueshme jashtë kompetencave të saja duke pasur ndikime politike. E ftuar në rubrikën “Opinion në “News 24”, Lala deklaroi se Arta Marku është në shkelje të hapur të ligjit më të gjitha veprimet që po bën. Gazetarja theksoi se është në shkelje të hapur të Kushtetutës. Lala shpjegon se kryeprokurorja Marku po ngjall frikë në prokurori. Me veprimet që po bëhen, gazetarja shpjegon se prokurorët do të jenë të detyruar që të zbatojnë urdhrat që vijnë nga lartë, po ashtu dhe të mbyllin dosjet.
“Arta Marku është me kompetenca të kufizuara. Lëvizjet në prokurori duken hapur se janë të ndikuara politikisht. E pa tolerueshme lëvizjet në prokurori që janë të emëruar. Kjo është kompetence e këshillit të lartë të prokurorisë dhe jo e kryeprokurores Arta Marku. Ka një problem që në kushtetutë, sepse kushtetuta ka një problem që nuk i jep tagër kryeprokurores së përgjithshme që të largojë prokurorët e emëruar. Edhe për zonjën Gashi duhet të ishte Këshilli i Lartë i prokurorisë që të vendoste për atë. Arta Marku është në shkelje të hapur të ligjit më të gjitha veprimet që po bën. Ajo është në shkelje të hapur të kushtetutës”, deklaroi Lala.
Nuk është e vështirë që të mbyllën dosjet në prokurori, Me të gjitha veprimet që po bëhen duke u shkelur dhe kushtetuta, Marku po ngjall frikë në prokurori. Ndoshta nuk është qëllimi i saj por me ato që po bën duket se Marku po kërkon që prokurorët të ndjehen të pa sigurt për vendin e tyre të punës. Kjo di ti bëjë ata që të zbatojnë urdhrat që vijnë nga lartë. E gjitha kjo do të sillte dhe mbylljen e shumë dosjeve që kërkon politika apo njerëzit me influencë,” deklaroi Lala.
Dje kryeprokurorja Arta Marku bëri këto shkarkime dhe lëvizje; Agron Gjana, Drejtues i Prokurorisë së Rrethit Gjyqësor Durrës, largohet nga kjo detyrë dhe caktohet në pozicion të përkohshëm si prokuror në Prokurorinë e Rrethit Gjyqësor Pukë. Drejtues i Përkohshëm i Prokurorisë së Rrethit Gjyqësor Durrës, caktohet zj.Donika Prela, aktualisht prokurore pranë kësaj prokurorie.
Dritan Gina, Drejtues i komanduar i Prokurorisë së Rrethit Gjyqësor Elbasan, i ndërpritet komandimi dhe kthehet si prokuror në Prokurorinë ku është i emëruar; Drejtues i Përkohshëm i Prokurorisë së Rrethit Gjyqësor Elbasan, caktohet prokurori, z.Ardjan Nezha.
Pali Deçolli, Drejtues i komanduar i Prokurorisë së Rrethit Gjyqësor Fier, i ndërpritet komandimi dhe kthehet si prokuror në Prokurorinë ku është i emëruar; Drejtues i Përkohshëm i Prokurorisë së Rrethit Gjyqësor Fier, caktohet prokurori, z.Fatmir Lushi.
Artur Ismailukaj, Drejtues i komanduar i Prokurorisë së Rrethit Gjyqësor Kukës, i ndërpritet komandimi dhe kthehet si prokuror në Prokurorinë ku është i emëruar; Drejtues i Përkohshëm i Prokurorisë së Rrethit Gjyqësor Kukës, caktohet prokurori, zj.Alketa Nushi.
