Gjykata e Fierit ka caktuar masën e sigurisë “arrest me burg” për 56-vjeçarin nga Roskoveci, Petrit Arapi, i cili dyshohet se ka abuzuar seksualisht me një 20-vjeçare me probleme të shëndetit mendor.
Kjo e fundit është në muajin e 7-të të shtatzënisë. Abuzuesi akuzohet për veprën penale “Marrëdhënie seksuale ose homoseksuale me persona të pazotë për t’u mbrojtur”.
Bashkëshortja e Arapit, në një prononcim për “Abc” është shprehur se nuk ka dijeni për këtë akuzë, dhe se sipas saj, bashkëshorti ishte thirrur në polici për kultivim të kanabisit.
“Unë nuk di gjë për këtë që thoni ju. Erdhi dje policia dhe kërkoi në shtëpi për drogë. Pastaj më thanë që e morën burrin se kishin gjetur drogë tek tokat. Nuk kam dijeni për këtë akuzë, dhe ne nuk kemi një fqinje me aftësi të kufizuara këtu”, ka thënë ajo.
Ajo më tej ka deklaruar se nuk kanë pranë tyre ndonjë fqinje 20-vjeçare me aftësi të kufizuara, dhe aq më pak që bashkëshorti i saj të ketë kryer një akt të tillë.
“Upupu çfarë thua ti kështu?! Nuk dimë një gjë të tillë ne, burri im është kapur për drogë. Po jetojmë me djersë këtu dhe droga ishte gjetur tek toka. Erdhi policia dhe e mori. Kaq di unë”.
