Kryeministri Rama nuk i besoi Saimir Tahirit asnjë ministri, edhe pse ky i fundit siguroi plot 18 mandate në Tiranë.
Rama ka komentuar për herë të parë lënien jashtë qeverisë së Tahirit sot gjatë një bashkëbisedimi me gazetarët.
Ashtu si në fushatë, kryeministri përmendi shembullin me futbollin, teksa tha se përzgjedhja e ministrave nuk është e ngjashme për përzgjedhjet në Kombëtaren Shqiptare të Futbollit, ndërsa sqaroi se gjithçka është bërë duke u menduar tre komponentë:
“Kjo nuk është si puna e skuadrës kombëtare të futbollit. Nuk është që qeveria është seleksion i atyre që do hynë në fushë dhe të tjerët janë në stol. Ne kemi nevojë shumë të madhe që të kemi të tre komponentët edhe partinë, edhe qeverinë, edhe grupin. Nëse komponenti i grupit do na dobësojë dhe nuk do investohej, ne do kishim problem shumë të madh dhe për vetë qeverinë. Qeveria ka nevojë që të ketë një grup që të mbajë nën presion.”
